“Байгууллага бүр 1 НИЙГМИЙН РЕКЛАМ” Нийгмийн хариуцлагын уриалга
НИЙГМИЙН РЕКЛАМ нь нийгмийн ухамсарыг гэгээрүүлж, хүмүүст итгэл найдвар, урам зориг өгөх АМИН ДЭМ болдог.
Тиймээс нийгмийн рекламыг хүний сэтгэлгээг өөрчлөх, нийгмийн сэтгэл зүйд эерэгээр нөлөөлөх зорилгоор болон бизнесийн байгууллагуудын хувьд нийгэмд зөв сайхан ойлголтыг өгч, хэрэглэгчиддээ хайрлагдах гэх мэтээр олон сайн сайхан зүйлд ашиглаж байна.
Мэдээлэл сурталчилгаа асар их болсон энэ зуунд хэрэглэгчид рекламнаас улам бүр залхаж байгаа бол харин нийгмийн реклам нь эерэг сэтгэгдэлийг төрүүлж хоногших нь удаан байдаг байна. Манайх супер гэж хоосон рекламдахын оронд нийгмийн сэтгэхүйд эерэг өөрчлөлтийг авчрах чухал санааг хөндөж нэр хүндээ өсгөх нь НИЙГМИЙН РЕКЛАМны давуу тал болж байна.
Тиймээс байгууллага бүр нэг нийгмийн реклам бүтээн олон нийтэд хүргэж нийгмийн хариуцлагаа хэрэгжүүлэхийг уриалж байна.
Иргэн: Ж.Лувсандорж
Бид эхлүүлж байгаа учир өөрсдөө үлгэрлэж доорх нийгмийн рекламыг бүтээлээ
Санаа болгох үүднээс хэдэн нийгмийн рекламны санааг дэвшүүлж байна.
- Мэбелийн үйлдвэр мод тарьж ургуулах тухай
- Сэтгэл зүйн төв гэр бүлийн харилцааны тухай
- Вэб технологийн компани ногоон маркетингийн тухай
- Савангийн үйлдвэр ээж аавдаа туслаж өөрсдийн хувцасыг угаах тухай
- Уут, сав баглаа боодлын үйлдвэр хог хаягдалгүй амьдрах тухай
- Татварын газар нэгэндээ тус дэмтэй амьдрах тухай
- Дэвтэрний үйлдвэр дэвтэрээ ариг гамтай ашиглах тухай
- Боловсролын байгууллагууд боловсрол, мэдлэгийн үнэ цэнийн тухай гэх мэт санааг хүргэж хэрэглэгчдийнхээ сэтгэлд эерэгээр хоногших боломж та бүхэнд байна.
Цаашид хүчирхэгжих чин эрмэлзэлтэй багийн гишүүдийн санах 10 зүйл
Facebook хуудас нээгээд олон нийтэд хүрч ажиллах гэж байгаа бол
Facebook хуудас нээгээд олон нийтэд хүрч ажиллах гэж байгаа бол мэдээлэлээ илүү тодорхой бичиж, хүний асуултанд бүрэн дүүрэн хариулж байна уу. Үйл ажиллагааг нь дэмжиж олон нийтэд хүргэх зорилгоор мэдээлэл асуухаар утасруу залга гээд байх юм. Би тантай утсаар ярихад 3 минутанд та зөвхөн 1 хүнд л мэдээлэл өгнө. Тэр бүр утсаар яриад байх зав хүн бүрт байхгүй. Залгалаач бүгд зэрэг холбогдож чадахгүй. Хүн 1-ээс илүү залгахгүй шүү дээ. Харин та энд бүрэн мэдээлэлээ бичээд, зөв харилцаж чадвал 40000 хүн-д мэдээлэлээ хүргэж болно. Олон нийтийн сүлжээ байдагийн шалтгаан нь энэ.
The New Media Group нь нийгмийн хариуцлагын хүрээнд цахим хуудас бүтээх үйлчилгээгээр 80’000’000₮-тэй дүйцэхүйц оюуны хөрөнгө оруулалт хийлээ.
Үүнд:
- http://blueskyeducationproject.org "Хөх Тэнгэр" Боловсролын төсөл нь бага ангийн сурагчдын боловсролын зардал, алслагдмал газар суугаа багш санхүүжилт тэтгэлэг олгодог.
- http://tedxulaanbaatar.com “Даян дэлхийд санаагаа хуваалцъя” уриан доор дэлхийн шилдэг шинийг санаачлагчид, сэтгэгчид жил бүр цугларан санал бодлоо хуваалцдаг олон улсын арга хэмжээ TED-ийн бүсчилсэн хөтөлбөр болох TEDx нь тухайн бүс нутгийн байгууллага, хүмүүсийн санаачилгаар өөрсдийн туршлага, санал сэтгэгдлээ хуваалцах, дэлхий дахинд хэрэгтэй шинэ санааг түгээх зорилгоор тусгай зөвшөөрлийн дагуу зохион байгуулагддаг арга хэмжээ юм.
- http://nomadicare.org Nomadicare нь тогтвортой амьдрал, боловсрол, нүүдэлчин ардын соёлыг хамгаалах, ардын уламжлалт болоод орчин үеийн эмчилгээг хослуулах, нүүдлийн соёл ардын дууг баримтжуулахыг дэмжин ажилладаг.
- http://advancehumanity.com Advance Humanity бол өөрийгөө болоод хорвоо ертөнцийг өөрчилж буй хүмүүнлэг энэрэнгүй хэн бүхний зочлох газар.
- http://yaruusetgegch.com “Яруу сэтгэгч” нийгэмлэг нь Монголын сэтгэгчдийг нэгтгэгч, дэмжигч байгууллага бөгөөд сэтгэгчдийн оюуны бүтээлийг олон нийтэд хүргэх тал дээр дэмжиж ажилладаг юм. Тэд өөрийгөө танин мэдэж, өөрийгөө илүү хөгжүүлж чадваржуулах зорилготой, хийж бүтээх хүсэл тэмүүллээр дүүрэн хэн бүхний өдөр бүрийн оюуны хоол, сэтгэлийнх нь гал болохуйц хүний хөгжлийн мэдээ, мэдлэгийн цогц цахим хуудасыг хөгжүүлсэн юм.
- http://gegeen.mn "Гэгээн Ундарга" холбоо ТББ нь залууст Англи хэл сурахад шаардлагатай материал, ном, аудио, видео хичээл, IELTS, iBT-ийн ном тохимолуудыг олгож, Орон орноос зарлагдаж байгаа тэтгэлгүүдийг танилцуулж, тэтгэлэгт хамрагдах бүх орчин нөхцөлийг хангаж өгөх зорилготой.
- http://musicagency.mn Монголын язгуур урлагийг дэлхийн олон оронд сурталчилан таниулж, дэлхийн томоохон шагналуудыг авч эх орныхоо нэрийг өндөрт өргөсөн урлагийн хамт олон юм.
- http://mongolshapers.org Монголын оюутнуудыг боловсролын тэтгэлэгүүдэд хамруулахад анхааруул хандуулан ажилладаг байгууллага.
- http://mongoldignity.org “Нэр Төрөө Эрхэмлэх Даян Дэлхийн Хөдөлгөөн” нь бусдын алдааг шүүмжлэхээс илүү зөв үлгэр дуурайллаас нь жишээ авч шалгарсан зөв зохистой үйл ажиллагаа болон нэр төрөө эрхэмлэх үзэлд тулгуурлан манлайлан удирдахыг дэмжин ажилладаг бөгөөд нэр төртэй амьдрах нийтлэг эрх ашгийг даян дэлхийд түгээн дэлгэрүүлэхэд энэ хөдөлгөөнийхний гол зорилго оршино.
- http://zorigsan.org Зориг сан нь жил бүр “Залуу Манлайлал” хөтөлбөрийн хүрээнд 21 шилдэг залуусыг шалгаруулан хөтөлбөрт хамруулсанаар эх орондоо ардчиллыг гүнзгийрүүлэх үйлсийг эрчимжүүлэхэд эрдэм мэдлэг, сурсан зүйлс, туршлагаараа хувь нэмрээ оруулах боломжийг нээж өгдөг. Хөтөлбөрт хамрагдагсад нь нийгэм, улс төр, эдийн засаг, бизнес, соёл урлаг, хүрээлэн буй орчин, хүмүүнлэг, нийгмийн харилцаа, хөгжилтэй холбоотой олон талт асуудлуудтай бодит амьдрал дээр биечлэн танилцаж, дээрх сэдэв болон салбаруудын үндэсний манлайлагчид, гадаадын экспертүүдээс суралцаж менежмент, манлайлах ур чадвар болон өрсөлдөх чадварыг нэмэгдүүлэх, ажил мэргэжлээрээ хурдан өсч хөгжих боломж олж авдаг.
Бага нуурын Цахилгаан Механикийн үйлдвэр бидний бахархал
Багануурын Цахилгаан Механикийн Үйлдвэрийн хамт олонд "Монгол хүний үнэ цэн" сэдэвт лекц уншихаар уригдаж 4 сарын 3-ны 7:00 Багануурруу хөдөллөө. Үйлдвэр дээр 9 цагт очлоо. Эхлээд үйлдвэрийн захирал нь үйлдвэрийн үйл ажиллагаа болон бүтээгдэхүүнүүдтэйгээ танилцууллаа. Цахилгааны шийд, сервэрийн хайрцаг, автобусны буудал, хогийн сав гэх мэт төмөр эдлэл, хийцүүдийг өнгө үзэмж сайтай, чанарлагаар үйлдвэрлэдэг ажээ. Хэрвээ захиалвал төмрөөр юуг ч үйлдвэрлэж чадна гэж хэлж байсан. Үйлдвэрийн тасаг цехээр ороход гял цал, эмх цэгцтэй, орчин үеийн машин техникээр тоноглогдсон агаад хийсэн бүтээлийг харахад "монгол хүмүүс чадаж байна шүү" гэж өөрийн эрхгүй бахархах сэтгэлийг бадрааж байлаа. Эднийд тулгардаг нэг бэрхшээл нь хийсэн загварыг хятадууд дууриаж хийгээд хямд оруулж ирэх явдал байдаг гэж байсан. Ямартай ч энэ үйлдвэр удахгүй олон зуун ажилтантай төмөр эдлэлийн томоохон үйлдвэр болж чадна гэдэгт итгэлтэй байна. За ингээд 10:00 цагт лекцээ уншаад, бэлдэж очсон ном, сонин сэтгүүлээ бэлэглээд буцлаа.
Замдаа Цонжин Болдогоор орлоо. Дэлхийн хамгийн өндөр морьтой хөшөөнд тооцогдож буй Их Хааны хөшөө, Алтан ташуур, дэлхийн хамгийн том гутал, Хүрэл зэвсэгийн үеийн Хүннү гүрний музей, Монголын эзэнт гүрний музей зэргийг үзэж сонирхлоо. Музейг заавал үзээрэй. Хүннү хүрний үеийн уран дархны ур хийц гайхамшигтай, дахин давтагдашгүй санагдсан.
"Алтан цом" улсын уралдаанд "Яруу эгшиглэн" хамтлаг түрүүллээ
"Алтан цом" хүүхдийн улсын уралдаан жил бүр болдог юм байна. 3-р сарын 26-ний өдөр Улаанбаатар дуу бүжгийн чуулгын байранд өглөө 10:00 цагаас 23:00 хүртэл бүтэн өдрийн турш наадлаа. Наадмаас ажиглаж байхад хүүхдийн дууны урын сан багатай нь харагдаж байлаа. Хүүхдийн уран бүтээлийг дэмжих тал дээр ажилламаар санагдлаа. Бизнесийн байгууллагуудын хувьд хүүхдэд зориулсан бүтээгдэхүүнээрээ хүүхдийн уран бүтээл болон авъяаслаг бүтээлч хүүхдүүдийг дэмжиж ажиллавал олон авъяаслаг монголчууд төрнө гэдэгт итгэлтэй байна.
Яруу эгшиглэн хамтлаг дуулж байна.
Бяцхан бүжигчин.
"Шинээр маркетингжуулна" зөвлөгөөний аян үргэлжилсээр... Талх чихэр ХК, "Хан бүргэдэй"
3 сарын 16
"Талх чихэр" ХК дээр
"Шинээр маркетингжуулна" аян үндэсний томоохон үйлдвэрлэгч "Талх чихэр" компанид хүрэлцэн очлоо. Хүнсний үйлдвэрлэл, тэр дундаа талх, гурилан бүтээгдэхүүн бол хүний амьдралын өдөр тутмын л хэрэглээ. Тиймээс хэрэглэгчиддээ илүү ойр байж цахим орчныг идэвхитэй ашиглах хэрэгтэй юм. За бас хэрэглэгчийг реклам сурталчилгаагаар залхаалгүйгээр хүнд хэрэгтэй юм хийж маркетингаа хийвэл их сайн байна.
"Талх чихэр" ХК үндэсний бүтээгдэхүүний дээжээс бидэнд барьлаа. ТаЧи зохицуулах үйлчилгээтэй бүтээгдэхүүний дизайн болон амт чанар нь таалагддаг. Бусад жигнэмэг, чихэр зэргийнхээ дизайныг үнэхээр сайжруулах хэрэгтэй харагдаж байна. Тэгэхгүй бол нэг л халтар харагдаад байна. За тэгээд бидний өгсөн зөвлөгөөг ашиглаж шинэ үеийн дэвшилтэт технологийг ашиглан хэрэглэгчидтэй харилцаж эхлэнэ гэдэгт итгэлтэй байна. Манай компанийн хувьд үндэсний үйлдвэрлэлээ дэмжих бодлого барьж ажилладаг учир бүх талаар хамтран ажиллахад татгалзах зүйлгүй.
3 сарын 17
"Хан бүргэдэй" ХХК дээр
Урлагийн менежментийг хөгжүүлэх хэрэгтэй
Монголын урлагт менежмент хийвэл дэлхийд байтугай гарч чадна. Урлагийн менежерүүд ховор байна даа. Авъяаслаг чадвартай залуус менежмент, дэмжлэг байхгүйгээс зэвэрч байна. Ялангуяа язгуур урлагийн төрлүүд. Энэ 2-ийн ялгааг хар даа. Ялгаа нь юунд байна гэж бодож байна.
Залуу хүн та болохгүй бүтэхгүйн 1000 шалтгийг биш болж бүтэхийн 1 аргыг л ол
/BAI.mn цахим хуудаст өгсөн ярилцлага/
Манай энэ удаагийн амралтын буланд “залуусийн төлөөлөл” хэмээн тодотгохоосоо илүү жирийн нэгэн хөдөлмөрч, бүтээлч монгол залуу болох “Яруу сэтгэгч” хүний хөгжлийн ниймэмлэгийн үүсгэн байгуулагч, NMMATeam Борлуулалтын хэлтсийн дарга Хар үхэрт овгийн Жамсранжавын Лувсандорж уригдан оролцож өөрийн бодол сэтгэгдлээ хуваалцлаа.
Түүнийг хийсэн бүтээсэн зүйлтэй, цаашид ч ихийг хийж бүтээхээр зорьж яваа залуу хүн гэдгээр нь онцлон ярилцсанаа эрхэм уншигчиддаа хүргэж байна.
Сар шинэдээ сайхан шинэлсэн үү? Луу жил урин дулаан сайхан эхэлж байна. Таны хувьд шинэ цагийн өнгийг хэрхэн шинжиж байна вэ?
Хүн бүр өөрийнхөө хамгийн сайн хийж чадах зүйлээ олж мэдрээд түүнийхээ төлөө үхэн хатан зүтгэх он жилүүд эхлэж байна гэж итгэж байгаа. Гадаадаас маш олон монголчууд эх орондоо ажиллаж амьдрахаар буцаж ирж байгаа юм байна. Гүйдлээ ололгүй мөнгө л чухал гээд гүйж байсан залуус маань мөнгөнөөс илүү үнэт зүйлээ ойлгоод, өөрийнхөө дуртай зүйлийг хийгээд эхлэхээр мөнгө араас нь гүйгээд ирнэ дээ гайгүй.
Таныг “Яруу сэтгэгч” сонины эрхлэгчээр ажиллаж байсныг санаж байна. Кино урлагийн дээд сургуулийг төгссөн гэж дуулсан яагаад сэтгүүлч мэргэжилд тэгтэл дурлах болов?
Энэ бол их сонин түүх дээ. 1999 онд Сүхбаатар аймгийн Баруун-Урт хотын Тэмүүлэл цогцолбор сургуулийг төгссөн. Тухайн үед мэргэжил сонголтын талаар бараг төсөөлөлгүй, хүмүүстэй ч ярьж зөвлөлддөггүй, хүмүүс ч ярьж зөвлөдөггүй бүдүүн тойм явсаар мэргэжил сонгох болчихдог юм байна.
Тэр үед би “Олон хүнд зэрэг нөлөөлж, хүний амьдралыг яаж сайхнаар өөрчилөх вэ”гэсэн асуултыг өөртөө тавьж явдаг байлаа. Тэгээд кино урлаг л олон хүний амьдралыг өөрчилж чадна гэсэн дүгнэлтэнд хүрсэн учраас энэ мэргэжлийг сонирхож байлаа. Гэсэн ч манай аймагт урлагийн сургуулийн хуваарь ирээгүй байлаа. 10 жил сурчихаад сургуульгүй хоцролтой биш дээ гээд ШУТИС-ийн Цахилгаан системийн анги сонголоо.
Аав маань намайг инженер хүн болгох сонирхолтой байсан учраас сонголтонд маань дуртай л байлаа. Ингээд ШУТИС-д 1 жил суралцсан боловч сонирхолгүй байсан учраас 2000 онд гэр бүлийнхэндээ хэлэлгүйгээр нууцаар Кино урлагийн дээд сургуульд суралцаж төгссөн. Төгсөөд хүний хөгжил, соён гэгээрлийн хэвлэлтэй болохоор шийдэж “Яруу сэтгэгч” сонинг эрхлэн хэвлүүлж эхлэсэн. Ингээд сониноос улбаалаад Монгол хүний хөгжилтэй холбоотой ажлууд ундарч эхлэсэн дээ.
“Яруу сэтгэгч” нийгэмлэгийн эрхэм зорилго нь “Хүн” рүү чиглэсэн гэж боддог. Ерөөс хувь хүний боловсролд анхаарлаа хандуулдаг нь олон ч хүмүүсийн оюуны хамгийн тэжээллэг хоол болж өгч байгаа гэж боддог. Анх энэ байгууллагаа хэрхэн яаж байгуулж байв? Хичнээн хүний бүрэлдэхүүнтэйгээр ажиллаж байгаа вэ?
2006 оны 4 сарын 5- нд “Яруу сэтгэгч” сонин байгуулагдсан. Монголын оюун санааны манлайлагчдыг нэгтгэн дэмжиж, тэдгээрийн оюуны бүтээл туурвилыг олон нийтэд хүргэж Монгол хүнийг чадваржуулан хөгжүүлэх чиглэл барьж ажилладаг. Анх гурван хүний бүрэлдэхүүнтэй, сонин хэвлэх мөнгөө ахаасаа зээлээд л эхлэж байлаа даа.
Би өөрөө сониноо үүрээд их дээд сургуулиудиар явж зардаг байлаа. Эрхлэгч нь ямар хүн байдаг вэ гээд асуухаар нь Лувсандорж гээд нэг хүн байдаг юм аа гэж хэлчихээд суудаг байлаа. /Инээв/ Одоо ТББ болсон. “Яруу сэтгэгч” нийгэмлэг нь зохиолч Д.Урианхай, Хооллолт судлаач Б.Гэрэлмаа, Хуульч, гэр бүл судлаач Л.Нарантуяа, Сэтгүүлч Б.Болормаа, Дээд эрүүл мэндийг үндэслэгч Х.Цэрэндорж зэрэг нэрт сэтгэгчидтэй хамтран ажиллаж байна. Удирдах зөвлөл, хүндэт гишүүд гэх мэт 10 гаруй залуус бий.
Эх оронч хүн гэж хэнийг хэлэх вэ? Та эх оронч хүн мөн үү?
Эх орондоо гай болохгүйгээр өөрийнхөө амьдрал ахуйг сайхан аваад явчихаж байвал эх оронч хүн мөн. Өөрийнхөө амьдралыг сайхан авч явж чадаж байгаа хүн бусаддаа үлгэрлэж, урам зориг өгч, зөвөөр нөлөөлж чадна гэсэн үг. Ингээд хүн бүр өөрийнхөө амьдралыг сайхан аваад явчихвал эх орон хүчирхэг, амар тайван болно.
Таны хувийн блог болоод твиттер хуудас зэрэгт бичигдсэн зүйлүүдийг чинь уншихад их өөдрөг хүн гэж бодогдсон. Нийгмийн байдлаас бид бухимддаг биш бид л өөрсдөө нийгэмд бухимдал үүсгээд байгаа юм болов уу?
Нийгэм чинь хүмүүс биднээс л бүтэж байгаа. Дэлхий ертөнц бидний оюун бодлоос бүрэлдэж байгаа. Ертөнц бүхлээрээ нэг цул мэдээлэл гэж үзвэл тэр мэдээллийн нэг хэсэг нь Монгол улс. Монгол улсын өчүүхэн жижиг мэдээлэл нь би. Тиймээс хүн бүр дор бүрнээ зөв зүйлийг сэтгэж, байгаль дэлхий, хүн төрөлхтнөө хайрласан бодол санаагаар жолоодогдон амьдарвал дэлхий ертөнц бидний бодол санаа шиг л болно гэсэн үг.
Монгол улсын иргэн гэдгээрээ бахархахаас гадна монгол улс нь иргэнээрээ бахархахаар хэмжээний байгаасай хэмээн хүсдэг юм. Таны хувьд, танай байгууллага хамт олны хувьд монгол залуусынхаа хөгжилд илүү анхаардаг юм шиг ээ.Энэ бодлоо ямар ямар ажил хэрэг болгож байв?
Лекц сургалт, ном сонин, сонсдог ном эрхлэн гаргах, радио, ТВ нэвтрүүлэг бэлтгэх, зөвлөгөө өгөх, хүмүүнлэгийн төсөл хэрэгжүүлэх гэх мэтээр мэдлэгжүүлэх, чадваржуулах олон талт ажлуудыг зохион байгуулж байсан. www.yaruusetgegch.com цахим хуудсаар зочлоод лекц сургалтыг нь үзэх боломжтой. Дунд хугацаанд залуусын хөгжлийн төвтэй болох зорилготой ажиллаж байна. Энэ чиглэлээр хамтран ажиллаж залуусдаа томоохон хөрөнгө оруулж байгууллагуудтай хамтран ажиллах саналтай байна.
Өнөөдөр улс төрийн байдалд, улс төрчдөд буруугаа үүрүүлээд “хүний хөгжлийн” гэх нэртэй тусламжаар амьдарч байгаа олон сайхан эрүүл чийрэг, оюунт монгол залуус бий. Мэдээж залуу хүний хувьд боломжит гарц бүхэн рүү тэмүүлж яваа болохоор өөрийнхөө зүгээс хараад дүгнэдэг л биз дээ?
Ороо бусгаа цаг үед хүн өөрийн үнэт зүйл, итгэл үнэмшилгүй болж төөрөлдөх нь бий. Залуус маань одоо өөрийн үнэт зүйл, итгэл үнэмшлийг өөртөө бий болгож, энэ амьдралд ирсэн утга учраа танин мэдэж өөрийн гараар өөрийн амьдралыг урлан бүтээх нь чухал юм. Асуудал бүрийн цаана ямар нэг боломж байдаг. Асуудал бүрийн цаана бизнес байдаг. Жишээ нь: Хортой хүнс гэдэг нэг асуудал байгаа бол эрүүл хүнсийг бий болгох боломж байна л гэсэн үг.
Өнөөдөр бид хятад ногоог биш монгол хүн бүрийг монгол хөрсөнд ургуулсан ногоогоор хангах боломж байна. Бид бүгдийг үйлдвэрлэх боломжгүй. Тэгэх ч албагүй. Хийж чадах хэдэн юм аа хийгээд, гадагш нь гаргамаар байгаа юм. Хятадаас ногоо, сүү, Европоос бяслаг, Америкаас жажлууртай тахиа, Солонгосоос чипс гэх мэт ходоодны хог новш авчирч, хүүхдүүддээ хор идүүлэхгүйгээр өөрснөө дотоодын хэрэгцээгээ хангах бүрэн боломж байна. Бид хүний юмыг л авчирж хангалттай зарлаа.
Одоо өөрснийхөө юмыг л зарах хэрэгтэй байна. Урлаг, соёл, авъяас, айраг, хоормог, ааруул, аялал жуулчлал, рашаан усанд оруулахаас эхлээд, эрүүл мэндийн аялал жуулчлал, адаглаад одтой тэнгэрээ харуулаад бизнес хийж болж байна. Газраа ухахгүйгээр их юм хийж болж байна даа. Чипс шиг савласан ааруул бол шүдгүй хүүхдүүд, кальцгүй ястай хүн төрөлхтний эрэлт хэрэгцээ болохоор глобал бизнес болохгүй гэх газаргүй. Тиймээс Монгол залуу хүн та болохгүй бүтэхгүйн 1000 шалтгийг биш болж бүтэхийн 1 аргыг л ол гэж хэлмээр байна.
Би саяхан хэсэг залуусын яриан дундаас “Эдийн засгийн хямрал, ядуурал бол монголын эмгэнэл” гэж хэлж байхыг сонссон. Таны хувьд?
Юмыг хөндлөнгөөс шүүмжлэх бол хэний ч хийж чадах хялбар ажил шүү дээ. Өөрийн нөлөөлж, шийдэж чадахгүй асуудлыг шүүмжилж цаг хугацаа, энергиэ барахын оронд өөрийн шийдэж, өөрчилж чадах 1 жижиг асуудлыг барьж аваад л шийдвэрлээд өөрчлөөд яваад бай. Ингээд шийдвэрлээд яваад байхад таны нөлөөлж чадах чадвар, хүч улам далайцтай болсон байх болно. Өөрийн хүрээллээсээ л өөрчилж нөлөөлж эхлэ. Найзуудаараа тойрч суугаад грушиг пиво дугтарч, болохгүй бүтэхгүй улс төр ярихын оронд энэ удаа арай өөр зүйл яриад үз. Хаягдал яснаас кальци гаргаж аваад зарж болох уу гэдэг ч юм уу?
Таны аав ээж, ах, эгч нар бас дүү тань ч гэсэн “Хүний хөгжлийн төлөө” гэсэн уриатай юм билээ.Гэр бүлээрээ нийгмийн идэвхитэй юм байна шүү дээ.Гэр бүлийнхнээ танилцуулаач.
Ээж маань уран гартай оёдолчин, аав маань ур ухаантай механик инженер хүн. Харин 2 өвөө маань шинийг санаачлагч, зохион бүтээгчид байсан. Авга өвөө Шагдарын Дулмаа маань Сүхбаатар аймгийн Халзан сумын уугуул. “Арьс элдэгч машин”, “Цутгамал чулуун хороо” гэсэн 2 ШБОС (Шинэ Бүтээл Оновчтой Санал)- ын гэрчилгээтэй байсан. Нагац өвөө Молом нь Сүхбаатар аймгийн Наран сумын уугуул. Анхны хуурай сүүг гаргаж авч байсан хүн байдаг.
Манай том ах Ж.Бэгзсүрэн Д.Нацагдоржийн нэрэмжит Хотын нийтийн төв номын санд Мэдээлэл автоматжуулалтын тасгыг хариуцаж ажилладаг. Дунд ах Ж.Ганжуурдалай, дүү Ж.Дамдиндорж нар барилгын засал чимэглэл, интерьерийн чиглэлээр ажилладаг. Эгч Ж.Хорлоо нь Сургуулийн Өмнөх Боловсролын Шинэчлэл болон Бага насны хүүхдийн хүмүүжил, төлөвшлийн асуудлыг судладаг сурган хүмүүжүүлэгч бүсгүй бий. Харин миний эхнэр В.Ундраа уран зураач бүсгүй.
Та өөрийгөө улс төрөөс хэр ангид гэж боддог вэ? Зарим залуу уран бүтээлчид, нийгмийн идэвхитэй залуус улс төр их сонирхож энэ талруугаа их татагдаад байгаа нь ажиглагддаг.
Улс төрөөс ангид хамааралгүй хүн гэж байхгүй л дээ. Ямар нэгэн байдлаар л хамаарч байгаа. Бид төрөө сонгож, төрөөс гарч буй хууль, тушаал, шийдвэрүүд нь бидний амьдралд буцаад нөлөөлж байгаа. Улс төрд оролцоно, нөлөөлнө гэдэг нь заавал улс төрч болохын нэр биш шүү дээ. Заавал улс төрч болж байж л улс орноо өөрчилж сайхан болгоно гэсэн үг биш шүү дээ. Өөрийнхөө хийж бүтээж байгаад эзэн болоод хамгийн ойр эргэн тойрноосоо л өөрчлөлтөө эхлэ. Бүүр өөрөөсөө эхлэ.
Ямар нэг намын гишүүн үү?
Намын гишүүн биш.
Залуу, монгол хүний хувиар тань хүсэл мөрөөдлийг тань асуумаар санагдлаа?
Монголдоо залуусын хөгжлийн төв байгуулах, амьтны хүрээлэн байгуулах, монголыг дэлхийд илэрхийлж чадахуйц брэнд бүтээгдэхүүний үйлдвэр байгуулах, авъяас чадвартай Монгол хүнд менежмент хийж дэлхийд таниулах гэх мэт тодорхой хийх ажлууд бий.
Ажлынхаа чөлөө завыг юунд шимтэн өнгөрүүлдэг вэ?
Өөрийнхөө хүсэл тэмүүлэлд л чөлөөт цагаа зориулна. Бодох, төлөвлөх. Зөвлөгөө сургалт зохион байгуулдаг.
Одоо ямар ажлыг эхлүүлээд эсвэл ажиллаж байна? Хэтийн төлөв?
The New Media Marketing Agency-ийг үүсгэн байгуулахад гар бие оролцож, мэдээллийн технологийн салбарт монгол залуусыг дэлхийд өрсөлдөхүйц бүтээл хийлгэх зорилгоор ажиллаж байна. Мэдээж чадварлаг олон монгол залуустайгаа хамтарч илүү олон ажлын байр бий болгоно. Монголын ирээдүй хойч хүүхдүүдийг зөв үнэт зүйлтэй, бүтээлч хүн болгон төлөвшүүлэхэд гар бие оролцох хэрэгтэй.
Таныг Их найрагч О.Дашбалбарын “Амьддаа бие биенээ хайрла хүмүүс ээ” шүлгийн мөрийг тарни мэт өөртөө шившиж явдаг тухай таны хувийн цахим хуудаснаас уншсан. Магадгүй яруу найрагт шимтэн дурладаг болов уу гэж асуусан юм шүү?
О.Дашбалбар агсаны ертөнцийг үзэх үзлийг нь хүндэтгэдэг. Хааяа бас толгойд мөрүүд орж ирвэл бичээд үлдээчихдэг. Би өөрийнхөө ТЭНГЭР МЭДНЭ гэдэг шүлгийг сонирхуулах зорилгоор биччихье.
Тэн гэрийн тамгатай газарт
Тэн гэртэй хамт төрөөд
Тэн дээ бид амьдарна
Тэн гэрт данстай
Тэн д бүртгэлтэйг
Тэр өдрийн
ТЭНГЭР МЭДНЭ
Тэнгэрийн доор ганц хуультай
Тэнгэр хэнийг ч ялгахгүй
Тэр бүхнийг мэднэ
Тэнгэрээс та бултаж чадахгүй
Булангийн араар нуугдаж болохгүй
Швейцарын банкинд ч нууж чадахгүй
Тэр бүхнийг харж байгаа
Эхнэрийнхээ араар тавьж болох ч
Тэнгэрийн араар тавьж чадахгүй
Тэрийг та аргалж болох ч
Тэнгэрийг та аргалж чадахгүй
Тэр таны дээр байна
Тэр бүхнийг
ТЭНГЭР МЭДНЭ
Үйл бүхэн чинь үртэй
Үг бүр чинь бүртгэлтэй
Үнэн амьдар
Үйлдэл бүрийг чинь
Тэнгэр шүүхгүй
Үйл чинь таныг шүүнэ
Үйлээ эдэл үр минь
Тэнгэр эцэг хэлнэ
ТЭНГЭР МЭДНЭ
“Тэнгэр нь хаясан” золиг минь
Тэнгэртээ та итгэвэл
Тэнгэр чинь таныг хаяхгүй
Тэнгэррүү хараад залбир
Тэнгэртэйгээ байхад алзахгүй
Түүнээс өшөө авах ч хэрэггүй
Тэнгэр бүгдэд хариу өгнө
Тиймээс санаа амар
Шударга хүнд айх шалтгаан үгүй
ТЭНГЭР МЭДНЭ
Хэн ч хараагүй
Хун ч сонсоогүй
Хүн ч мэдээгүй
Тэр харсан
Тэнгэр сонссон
Тэр тольдож байгаа
Тэнгэр биднээс дээр байгаа
Тэр бүхний дээр байгаа
Тэнгэрийн доор төрөөд
Тэнгэрийн дээр очно
ТЭНГЭР МЭДНЭ…
Ярилцасан Ц.Тамир
Эх сурвалж /bai.mn/
Фотог Б.Батзаяа
МАРТ-аар Зэвсэгт хүчний 015-р ангийн дайчин бүсгүйчүүдийг баярлууллаа
Хандгайтын ардхан талд "Бага баян" цэргийн амралтын газар байдаг юм байна. Энхийн сахиулах ажилд оролцоод ирсэн дайчидад зориулж цоо шинэ амралтын цогцолбор баригдаж байгаа юм байна. Энд баяраа тэмдэглэлээ.
За цэргийн хоолны газар шиг санагдаж байгаа биз. Хоол нь ч мөн адил.
Баяр дээр баяр нэмэх гэж энэ хэдэн хөгжөөнт, авхаалж самбаа шаардсан тэмцээн, багийн уур амьсгалыг нэгтгэж өгдөг хэдэн тоглоомыг тоглууллаа.
МИЙН - Жинхэнэ цэрэг бүсгүйчүүдэд тохирсон тэмцээн дээ.
ТЭСРЭХ БӨМБӨГ хамтрагчаа мэдэрч ойлгох чадварыг хөгжүүлэх багийн тоглоом эхлэж байна.
